Hugo Mamani Aruquipa
Achka watañam Perú mama suyunchikpiqa kay EIB nisqamanta rimarinchik, ichaqa manamá llaqta kamachikuqkunamanta, hina llaqta runakunamanta, chaynallataq kuraq yachay wasikunamanta ima ancha chíla yuyaywanchu sut’inchanchik. Imarayku? Kay llamk’ariyqa, sapanka ayllupim llapan runakunawan qhawarikunan. Chaynam umalliqkunaman, tayta mamakunaman, llapa llaqta runaman imam mink’arinanchik, kay EIB nisqa chaninchakunanpaq. Paykunayá EIB nisqap chaniyninta mast’arinanku, hinamanta allin yupaypi puririnanpaq, q’imirinanchikpaq ima. Chaymi ayllukunapi huñulla, huk sunqulla puririy pacha kanman, yacharinanchikpaq-yacharichinanchikpaq ima. Hinam kunan pacha wawakuna yachay wasipi qillqayta, ñawinchayta yacharinqaku, chaynachá qhichwa yachay tarpuyninchik wiñaypaq kawsarinman.
Kunan pachaqa rimanakuy pachapim kanchik, chayrakum wawakuna yachachiqpas allinta qhichwa simitaqa yachanan. Wawa yachachiqpunim ayllup yachay tarpuyninta, siminta ima, allin ch’uya kallpachasqa wiñarinanpaq yuyaychanan, chaytaqmi muhuchasqa qhipa pachapi kananpaq.
Ichaqa PACHA MAMAMANCHIKWAN mana rimanakuy kanchu, chaymi yuyanchakunapaq kachkan, hinam kay EIB nisqa rimanakuypi saphisqa, tiqsichasqa kanan. Hinachá ichapas sarunchaymanta pacha mamataqa qispirichisunchikman. Chay ruruykunaqa ayllumantapacham hamunan, kay rimaywanmi nichkanchik EIB nisqaqa manam rurayta yachachiwanchikchu, aswanpas tutayachichkawanchik, chaymantapas rurayninchikkunata, yachayninchikkunata, munakuyninchikta imam qunqarichipuchkawanchik. Sapa runa kaynallatañam kamachiwanchik, chaymi ‘antropocéntrico’ nisqa kastilla simipi. Chayraykum manaña kawsanchikchu, aswanpas tiyaylla tiyanchik mana yuyaywan mana yuyasqa.
May pacha ruraywan kay EIB nisqata huñulla yacharisunman, chayqa aswanchá runachakunman kawsananchikpaq. ¡Tupananchikkama llaqtallay!
with organic products – kudos, and cuddles, to them.
